【明報專訊】唔少素人出戰今屆區選，近日有人成立「區義員Watlunteer」，希望招募義工為有需要嘅民主派候選人助選。呢個民間助選團特別之處，係引入「流水式助選」模式，即係助選義工團嘅人手係流動嘅，唔會被強行指派畀某一候選人，助選團成員可以自由選擇係咪幫有需要嘅民主派候選人。 現有百多人 多主婦銀髮族學生 「區義員」聯合發起人PY同Emily 講，建制派財雄勢大，每次都動員大批人助選同做文宣等工作，反而好多真心為民嘅候選人就缺乏人手，加上近期有好多襲擊候選人嘅事件，「區義員Watlunteer」希望守護真正為居民發聲嘅候選人，「我哋提供多一個渠道，聯合一班想為抗爭出力，但因各種原因無奈唔可以走上街頭嘅人，等佢都可以出多一分力」。PY話目前義工團約有百幾人，以銀髮族、主婦同學生為主。 另一發起人JC就話，成立「區義員」嘅目標係踢走保皇黨，重奪區議會議席，「所以只要係同民眾理念相近嘅(候選人)都會幫，而民主派就比較接近我哋嘅理念」。不過JC話喺幫候選人之前，會查閱一次該人係咪值得幫，「唔係每個自稱民主派嘅候選人我哋都會幫」。
|
| |
| |
