【明報專訊】10月6號港島反蒙面法遊行當日，一名港台記者中咗燃燒彈，身上雨褸燒着，耳仔同頸受傷，情况嚴重，要留院一個星期。新民黨立法會議員葉劉淑儀噚日喺facebook出post，話已分別去信廣播處長梁家榮同埋記協主席楊健興，一方面慰問受傷記者，又希望傳媒客觀公正報道事實，「齊聲向暴徒說不」。 建議有暴力衝突可考慮暫離 警方可更迅速處理危機 葉太上載信件以英文撰寫，佢喺fb話反修例引起嘅社會運動至今已4個幾月，相信各位記者「日以繼夜地採訪，早已身心疲倦」，又對克盡己任嘅記者「致以崇高敬意」。佢提到記者採訪時應以自身安全為先，特別係暴力不斷升級，「暴徒武器的殺傷力愈來愈大，記者若仍站在前線探訪，人身安全問題實在值得關注」，所以佢建議行家若發生暴力衝突，可考慮暫時離開現場，警方亦可以更迅速咁處理危機。 佢又話運動已偏離原意，形容市民活在惶恐中，私人企業、港鐵被破壞，亦影響經濟民生，佢希望傳媒可以「客觀公正地報道事實，齊聲向暴徒說不」咁話。 其實喺衝突現場，警察嘅武力亦不斷升級，亦不時發生記者畀警員推撞，畀胡椒噴劑、催淚彈等各式彈藥噴中射中，亦有行家因而受傷，唔知葉太會唔會幫手反映？
|
| |
| |
