【明報專訊】有神秘人以「IdeasforHK」名義，前日喺報章賣「百萬求一路」頭版廣告，話會用100萬元獎金，尋求「能解決現時香港困局、尋回昔日香港的方案」，引起社會唔少討論，網民並有多個提問。「IdeasforHK」facebook專頁噚日就出咗「回應帖」回覆提問，不過網民似乎仍未滿足，特別係組織背景問題，「尋路人」僅稱佢同其他有心人背景一啲都唔神秘，「但暫時我們不透露太多，是希望避免引起社會上不必要的討論，希望市民大眾可以一起聚焦想想解決方案」。

指徵集私隱只用於發放獎金

至於資金來源，尋路人就話，活動獎金係「一個希望尋求出路嘅熱心香港市民」以個人名義送出，係出於為香港好、為香港年輕人好、想尋求一個方案嘅一份心意。對於會否「走數」、人哋獻計後無錢收之餘仲被偷橋，尋路人就話會請專業會計師同核數師為項目把關；又強調方案徵集嘅私隱只用於聯繫發放獎金，活動後會銷毁。