【明報專訊】立法會新界西議員何君堯提出 9．21搞「清潔香港」行動，言論惹火，但未到9．21已有網民號召周三(18日)晚先同何君堯打招呼，因為當晚何君堯有份嘅愛駒「天祿」會出賽夜馬；網民話7．21白衣人元朗襲擊事件後，何議員首次有馬出賽，網民要入場「支持何老大愛駒」，仲落tag講「幻彩耀天祿」、「星光熠熠」，話要同佢打氣。 馬會話，會按照一貫做法，因應每個賽馬日嘅情况作出所需安排，以確保賽事順利。馬會無講會點樣處理保安，而Emily上周三見到，馬迷入公眾席，有保安檢查入場者嘅袋，唔知聽日會否有同樣安排，亦唔知激光筆等物品可唔可以帶入馬場。 馬會安排咗天祿跑第一場，按一般情况大概會於6點45分行沙圈，7點15分開賽。天祿馬主係何偉誠、何君堯及李星強，今季跑二班馬，睇番資料，上季上陣6次，取得兩冠一亞成績。
|
| |
| |
