【Emily】藍衫人踩場 利東孖寶議辦現連儂牆
[2019.08.16] 發表
【明報專訊】反修例風波其中一個象徵係喺社區開花嘅「連儂牆」，示威者以便利貼寫上各種訴求同心聲。噚日「利東孖寶」南區區議員區諾軒、羅健熙嘅辦事處，就有一群著藍色衫嘅人嚟到貼上便利貼，寫咗唔少粗鄙侮辱字句，包括「禽獸」、「X街」等。不過有關辱罵似乎冇乜效果，反而令佢哋嘅議辦成為街坊打卡點，羅健熙仲話「我地一班利東街坊好開心」。
內容粗鄙 區諾軒不怒反笑
話說facebook專頁「南區萬事屋」噚日出post，話下晝3點幾有一群身穿藍色衫嘅男人去咗「利東孖寶」議辦貼便利貼，又引述街坊話當中包括正義聯盟主席李偲嫣，形容係「革命輸出成功」、「藍衫人終於痴(黐)紙唔撕紙」咁話。睇番便利貼內容，用字相當粗鄙，包括「食屎」、「傻X」等，未見有任何具體內容或訴求。
羅健熙其後同呢幅「連儂牆」合照，仲笑啲紙黐唔實，「大風少少都吹走，到今晚唔知剩番幾多」；仲話自己好慘，要一路出議辦執番啲紙，叫街坊想參觀就唔好太晏。區諾軒就話對於同偲嫣緣慳一面覺得可惜，仲舉起V字手勢同呢幅「連儂牆」合照。
更多港聞
【Emily】「自由黨黨友」函領導 斥勿反政府 田北俊促開名：係咪入錯黨？
【明報專訊】反修例風波期間，自由黨唔少領導層都對政府提出尖銳嘅意見，有自稱自由黨黨友日前去信榮譽主席田北俊、黨魁鍾國斌、主席張宇人等，話如果... 詳情
【Emily】男子穿橙背心拍示威 now澄清非該台記者
【明報專訊】反修例風波引發連場示威，一眾記者每日奔走現場，但亦不時有人被指控係「假記者」。now新聞台噚日發聲明澄清，話發現近日有人身穿印有... 詳情
相關新聞
