【Emily】「自由黨黨友」函領導 斥勿反政府 田北俊促開名：係咪入錯黨？
[2019.08.16] 發表
【明報專訊】反修例風波期間，自由黨唔少領導層都對政府提出尖銳嘅意見，有自稱自由黨黨友日前去信榮譽主席田北俊、黨魁鍾國斌、主席張宇人等，話如果再以自由黨名義作出反國家、反政府等行為，將會成立一個「反田北俊、鍾國斌、周梁淑怡及劉健儀」嘅群組，以至退黨並成立新嘅商界政黨。田大少就喺facebook請呢班黨員開名，「如果唔係，好難去中聯辦領功」；並質疑佢哋「你會唔會係入錯黨？連最基本的政治光譜都唔識，民建聯都唔收你／你哋啦」。
自稱「一眾多年來熱愛自由黨的兄弟姊妹」喺信中稱，強烈不滿鍾國斌、田北俊等人去信特首林鄭月娥要求撤回修例同成立獨立調查委員會；又斥田北俊於2003年不支持就23條立法後，自由黨變建制派叛徒，失去國家及建制選民支持，導致該黨喺政界失去原本地位及影響力。
另外，新民黨主席葉劉淑儀早前向本報表示，認為警方喬裝示威者係不可能嘅事；佢噚日就喺港台節目上話，因當時覺得有啲錯愕，所以先有此說法，但認為警方做法並非不合理。葉太解釋，本身認為警員受過嚴格訓練，唔會做違法事情，後來理解警方解釋及現場環境後，知道佢哋有必要咁做。
更多港聞
【Emily】男子穿橙背心拍示威 now澄清非該台記者
【明報專訊】反修例風波引發連場示威，一眾記者每日奔走現場，但亦不時有人被指控係「假記者」。now新聞台噚日發聲明澄清，話發現近日有人身穿印有... 詳情
相關新聞
