【明報專訊】反修例爭議持續，星期一(5日)有市民發起「三罷」，職工盟事前都有發聲明呼籲打工仔響應，適逢噚日係職工盟教育基金賣旗日，全國政協副主席、前特首梁振英對職工盟支持罷工好不滿，日前已喺facebook提醒市民職工盟賣旗消息，呼籲大家抵制。CY嘅呼籲有人話響應，但同時亦「提醒」咗唔少人噚日去支持，變相曲線助籌款。職工盟主席吳敏兒同Emily講，噚日賣旗期間，有唔少市民都拎住部電話，畀佢睇CY嘅帖文，仲話因為咁而要捐多啲。 吳敏兒話，以往職工盟賣旗，都會有啲市民責罵佢哋做工會係「搞搞震」，今次賣旗前都預咗可能會有市民話早幾日罷工係阻住市民，但估唔到噚日反而無遇到呢啲場面，仲覺得多咗市民買旗，甚至有市民會捐500蚊。由於旗袋要交番銀行點算，暫時未知道今次賣旗成績，不過吳敏兒都話要多謝CY先。
|
| |
| |
