【明報專訊】修訂《逃犯條例》風波引發遊行「遍地開花」，繼屯門、尖沙嘴後，將軍澳7月21日亦將有遊行，訴求包括「拒絕紅色媒體」。不過，遊行由地區組織「區政聯盟」協助申請不反對通知書及出post，就被質疑涉政治宣傳；區政聯盟噚日再出post，強調遊行由民間自發，地區組織係協助申請不反對通知書等。 澄清只協助處理不反對通知書 區政聯盟日前喺fb話7月21日遊行路線將會途經《星島日報》、《蘋果日報》、TVB大樓等，並交代正申請不反對通知書但暫未獲發，個post嘅相亦有「區政聯盟」同「將軍澳民生關注組」logo；雖然明言「無選舉宣傳」，但仍然有網民質疑係咪涉及政治造勢。 面對質疑，區政聯盟噚日喺fb再出post，就見唔到有組織logo；帖文話遊行係自發組織「將軍澳人」發起，並由地區組織協助處理不反對通知書、物資提供及技術顧問等事宜，遊行無金錢募捐，亦唔希望見到政治組織展示宣傳物。 區政聯盟5月底成立，唔少成員去年底退出民主黨，包括大埔區議員區鎮樺、沙田區議員丁仕元等，聯盟召集人就係社區主任柯耀林。
|
| |
| |
