【明報專訊】理工大學紡織及服裝學系嘅學生同智障者、精神病康復者，喺過去兩個月一齊設計時裝，Emily以為係學生教智障朋友，原來學生話係參加嘅智障者教佢哋點樣整頭飾，佢哋噚日仲齊齊行Catwalk，好開心。 思盈教整頭飾 兼為同學減壓 自細鍾意粉紅色嘅思盈有輕度智障，平日家人唔畀佢著裙，要佢做運動減到肥至畀佢著。今次喺「時裝型聚力2019」，佢可以同理大學生商量設計服裝，圓著裙夢想。思盈話與學生相處好似朋友咁，仲成日分享自己14歲就做阿姨嘅經歷畀同學知。 首度接觸智障者嘅理大學生Jackie一開始都好擔心點同思盈相處，相處落發覺思盈好健談，又樂意分享屋企嘅事。另一學生Vivian對思盈最深刻嘅印象係佢對數字敏感，記性好，會記得晒合作嘅3個理大學生嘅生日。Vivian好欣賞思盈嘅單純，話呢種簡單嘅生活方式，比起一般人強迫自己用好多事填滿生活更美好。 另外，剛於理大畢業嘅Aggie最近因為學業同前途而好大壓力，但佢覺得之前一星期同思盈相處嘅兩三日係最放鬆嘅時刻，同佢傾偈可以減壓；思盈又教佢哋好多嘢，例如教摺裙同頭飾上面嘅花。
|
| |
| |
;){kind=small}
