【明報專訊】財委會主席陳健波(波哥)早前見傳媒時，提到自己好努力先有較安穩生活，現時係「收成期」，其言論引起爭議，有網民甚至拍片、rap歌諷刺一番(圖)。唔少民主派議員噚日喺財委會上亦批評波哥嘅言論，質疑佢自私，熱血公民鄭松泰引述有網民話，𠵱家係波哥嘅「收成期」，但就變咗政府嘅「收皮期」。

面對質疑，波哥無動氣，仲話睇過網上條片，認為拍得相當好，「希望廣傳，等多啲年輕人知道有個人叫陳健波，都係好事嚟嘅」。

更多人認識 波哥話好事

話說噚日財委會討論中止待續項目期間，民主派議員區諾軒提到網上有首rap歌好好聽，仲即場rap畀大家聽，「千祈唔好破壞你嘅收成期」；新民主同盟范國威不遑多讓，除咗質疑點解波哥咁自私，仲即場rap埋「天崩地冧最緊要你個收成期」，批評波哥將個人榮辱得失扣連喺財委會審議項目嘅優次緩急之上。

鄭松泰就話，波哥作為主席，應該有政治智慧及判斷，唔好下下由自身角度出發。