【明報專訊】區議會選舉年底舉行，有社區主任同Emily報料，話有機構喺區內做民調，問街坊認唔認識區內嘅地區服務者、會支持邊位、最關心嘅社區議題等。不過，研究員似乎冇做足功課，好多時都唔認得啲社區主任，捉埋佢哋幫手做問卷。 社區主任質疑建制派開始數票 公民黨美孚北社區主任李俊晞(Joshua)透露，早前喺區內被「香港社情研究協會」研究員捉住做問卷，其中一條問題竟然問佢有冇聽過「李俊晞」，同埋當區區議員張永森。Joshua話兩個都聽過後，研究員就問佢會評幾多分，同埋會投邊個一票；Joshua就話兩個都畀6分，投邊個就未諗到。 除咗Joshua之外，旺角東社區主任林兆彬(Ben)都話，有「香港社情研究協會」研究員搵佢做問卷，問佢有冇聽過「林兆彬」同當區區議員黃建新等，Ben冇表露身分，點知傾傾吓，研究員見到附近嘅橫額有Ben個樣，就識穿咗佢真正身分。 經民聯否認委託做民調 Ben話民主派冇資源做問卷，估計係由建制派委託，藉此掌握民情、了解街坊關心咩議題，甚至開始數票。不過，黃建新就同Emily講，佢同經民聯都冇委託人做民調，「都係做自己工作」。到底民調係邊個做？就真係不得而知啦。
|
| |
| |
