掌社區共享投資基金 關則輝要推社會黏合劑

【明報專訊】近幾日發生多宗涉及病弱人士照顧者嘅慘案，今日開始接任社區投資共享基金主席嘅恒隆地產集團傳訊及投資者關係董事關則輝(CF)同Emily講，佢有親身經歷，深深體會到照顧者身心疲憊嘅感覺，嚟緊會致力用基金推動「社會黏合劑」，透過鄰里關係幫助呢班照顧者。

曾照顧老父 明白照顧者壓力

CF話時不時都留意到呢類照顧者壓力太大而輕生嘅新聞，亦都好理解，因為佢都曾經要照顧年老嘅爸爸，不過好彩佢有5兄弟姊妹，大家可以分工合作。佢話如果係得佢自己一個面對，壓力就會大好多，所以其實照顧者都需要渠道宣泄。

社區投資共享基金喺2002年成立，一直致力透過鼓勵鄰里守望相助，推動社會資本發展。CF解釋，喺常規社會工作以外，其實社區上都可以做多啲嘢，透過加強鄰里關係，令呢班照顧者可以組成小組互助，佢話呢啲叫「社會黏合劑」。

搞活動畀年輕人多參與社區

CF又話上任之後，尤其希望年輕人多啲參與社區，佢舉例，可以搞活動叫後生仔教老人家用WhatsApp，後生仔可以發揮自己長處，老人家都可以從溝通中分享人生經驗，做到凹凸互補。