【明報專訊】前財政司長曾俊華每星期喺商台開咪節目《薯片鬚MUSIC》，透過音樂分享吓事業、家庭、生活，Emily聽聞，嚟緊星期日呢集佢會大爆當年做港督彭定康私人秘書時嘅趣事。其中教英文環節佢教「Pull someone's leg」呢句，話意思係玩人、呃人，或者係用幽默方法去搞人，多數係希望對方相信一件唔係真實嘅事。曾俊華當年就以為時任英國首相馬卓安嘅來電係整蠱電話！ 話說曾俊華喺1995至1997年擔任彭定康私人秘書，當中有九成打去彭督度嘅電話都由佢處理。曾俊華喺節目憶述，有一日佢喺肥彭嘅私人線接到一個電話，對方話要搵Chris、即係肥彭，曾俊華問對方係邊位，對方答自己係John Major(馬卓安)。 稱黎偉略曾扮得好似 曾俊華話佢當然唔信，因為當時有唔少人包括記者都試過用同一手法，希望搵到彭定康傾幾句；而一般英國首相府來電，都會由私人秘書先致電佢再轉駁，佢從未試過收到首相親自來電，所以覺得係整蠱電話，「雖然把聲真係好似，但我都聽過細龜(Edward Llewellyn，肥彭愛將黎偉略)好多時扮John Major把聲，仲扮得好似！」所以回應對方「you are pulling my leg!」，然後收線。 曾俊華話，事後致電馬卓安私人秘書，發現真係馬卓安打嚟，於是隨即安排馬卓安同肥彭通話。嗰次佢將真嘅當成假嘅，曾俊華喺節目度就話﹕「都係小心啲好！」
|
| |
| |
;){kind=small}
