【明報專訊】原本係中聯辦法律部部長嘅王振民去年底離任，返到清華大學擔任港澳研究中心主任，有知情者話佢現時主力做粵港澳大灣區工作。王振民噚日出席中華總商會舉辦有關大灣區嘅論壇，會後被問到政府修訂《逃犯條例》嘅建議，王振民話無「思想準備」回答呢方面問題；至於點解多年香港同內地都無法達成長期協議，佢話「原因你們應該知道」。 中港為何沒協議？ 「原因你們應知」 王振民喺論壇擔任演講嘉賓，提到中港兩地簽證問題。佢話原本大家期待香港回歸後，內地同香港嘅來往會更方便，但實際上係更唔方便，佢以自己做例子，話去英國有183天多次往返嘅簽證，但嚟香港就要「來一次簽一次」。 佢又話，有一次有個外國朋友先到香港再飛到北京，但因為冇中國簽證，去到香港機場唔畀登機。呢名朋友即刻打電話畀佢問「香港有沒有回歸中國」，王振民就回應，「我們一國兩制」。佢話歐盟咁多個國家可以用一個簽證，「我們一個國家三個Visa」，提出能否有制度創新，畀灣區內可以用一個簽證。
|
| |
| |
