【明報專訊】美國藝術家KAWS創作、總長37米嘅巨型充氣藝術裝置「COMPANION」到咗金鐘添馬公園對出海面，過百市民喺海旁迎接。KAWS同Emily講，創作時希望作品可令港人放鬆，抽少少時間同COMPANION 一樣瞓低望吓天空。

有唔少KAWS嘅愛好者專登到場合照「打卡」，施先生約5年前開始鍾意KAWS嘅作品，收藏咗唔少KAWS嘅模型公仔同衣物，噚日仲專登請咗半日假，帶埋其中一隻收藏品去同COMPANION影相。

氣球師徐小姐喺上次充氣黃鴨嚟香港展出時，已用氣球扭咗隻黃鴨帶去合照，今次就扭出COMPANION氣球公仔，仲話氣球公仔一樣可以浮喺水，非常可愛。

COMPANION游到去金鐘未夠一日，就有市民見到佢漏晒氣，Emily問過點解，原來係公仔一度斷咗充氣，但處理後已經肥番晒，大家可以繼續打卡。

一度漏氣 禁飛區有人航拍

大會提醒市民現場係禁飛區，唔可以用航拍機，但Emily就見到有最少4部航拍機飛緊。民航處就話維港一帶及沿岸地區都不得放飛無人機，但就未有接到相關投訴。