【明報專訊】醫院管理局行政總裁梁栢賢(PY)將於明年8月1日正式展開新一頁，CEO一職則由現任聯網服務總監高拔陞接棒，最新一期醫管局刊物《協力》率先訪問兩人，揭開佢哋鮮為人知一面。原來PY喺年輕時係一名「情聖」，不惜為女友辭去聯合醫院醫生一職，陪伴摰愛渡過視網膜手術難關。

PY喺澳洲讀醫科時邂逅女友，即係𠵱家?梁太。PY畢業後跟女友回港工作，喺聯合醫院任骨科醫生。有一日女友突然視網膜脫落，PY向醫院請假希望陪女友完成手術，點知上司以醫院繁忙為由唔批長假，PY索性為愛人辭職。二人最終共諧連理，育有兩女，現均已投身社會工作。今年中秋，PY仲夫妻檔去加拿大黃刀鎮睇極光。

高拔陞陪阿女追韓星

至於高拔陞就喺教會活動認識太太，兩人育有一子一女。佢形容太太好有智慧，好包容佢嘅任性，例如兩年前佢去學電單車、踢足球同跑馬拉松導致多次受傷，及瘋狂收集歷史書等。高拔陞又形容自己係「跟得爸爸」，除陪阿仔溫書，仲會陪女兒去亞博館追韓星。