【明報專訊】政界人士多應酬，唔少議員隨時一晚都要走幾場地區活動，喺今年3．11補選中勝出進入立法會嘅民建聯鄭泳舜(Vincent)，過往做開運動，又玩三項鐵人，佢噚日就喺facebook上載做健身嘅相，舉住鐵嘅佢話「我心不死」。
Vincent話現時朋友見到佢第一句通常都會話佢「肥咗咁多」，街坊又會叫佢「唔好再肥落去」，仲透露之前著開嘅西裝全部都唔啱著，但強調「絕對唔係好食好住咗」。
似乎幾介意自己肥咗嘅Vincent同Emily講，自今年3、4月至今已經重咗成30磅，最高峰時去到超過190磅，近日積極減磅輕番少少，希望能減至大約160磅，所以積極運動。議會工作忙，佢唯有食得清啲、夜晚盡量食少啲，而噚日張健身相就係特登朝早6點起身，約咗教練7點鐘訓練，睇嚟佢減肥決心好大。
