【明報專訊】民建聯由2013年起舉辦「香港年度漢字評選」，邀請全港市民投票選出一個具代表性嘅漢字反映心聲、總結過去一年。今年都唔例外，活動抽獎禮品亦非常豐富，但不時鼓勵市民多去祖國認識、了解嘅民建聯，送出嘅頭獎機票就唔係請幸運兒坐飛機去內地，而係雙人來回日本機票，二獎係雙人來回曼谷機票。其他禮品包括華為手機、旅遊禮券同書券。 其他獎品有華為手機 今年候選漢字有10個，當中唔少都同政治議題有關，如「判」字指唔少2016年旺角大衝突嘅案件都喺今年審結並判決、「禁」字就係關於保安局正式刊憲禁止香港民族黨運作、「順」字係話修改《議事規則》之後「拉布」減少。民生議題都備受關注，有「樓」有「地」唔意外，前者講港人希望早日上車買樓，後者就係有關土地供應專責小組展開為期5個月嘅「土地大辯論」。其餘5個漢字為「風」、「民」、「守」、「通」同「公」。 青年民建聯主席顏汶羽喺facebook形容，今年對佢嚟講係坐唔定嘅一年，先後走訪內地多個城市，又話港珠澳大橋、高鐵西九站都喺今年啟用，對出門嘅人而言係好消息，唔知佢會唔會揀代表基建通車嘅「通」字呢？
|
| |
| |
