【明報專訊】九巴推咗月票計劃快半年，嚟緊9月開始，乘客唔使再跟月份買，而係連續30日咁計，仲可以揀即日定之後7日內生效。九巴商務及資產管理部經理梁領彥話，如果乘客周六買月票，可以揀周一返工時生效，彈性大咗。佢仲同Emily講，已經研究緊平價版月票，希望今年內可以提交政府。
大學生搭巴士冇半價，交通費都係一大負擔，九巴傳訊及公共事務部副主管林子豪透露，已經同13間大專院校傾緊，喺校園內安裝優惠站，學生或者教職員搭巴士返學，只要喺部機嘟一嘟，即可退兩蚊，希望未來一個月內安裝到。
早排有網民影到巴士上有部貼住「測試中」嘅機器，林子豪承認九巴「探究緊新付款方法」，部機只係內部測試，未諗住推出。推咁多優惠，搭開巴士返工嘅Emily好驚會加價，林子豪都話，過去兩年油價貴咗好多，上次九巴向政府申請加價已經係5年前，承認有加價壓力，但就冇講實幾時加?。
