「模擬立法會」閉幕 梁君彥籲接棒

模擬立法會閉幕典禮噚日舉行，立法會主席梁君彥無暇出席，但都好有心拍咗短片，呼籲同學多啲關心社會公共議題。（劉焌陶攝）

【明報專訊】早前立法會法案委員會審議《廣深港高鐵(一地兩檢)條例》時，泛民同建制派議員喺會上舌劍唇槍，民主派提出嘅修訂亦全部被否決；但喺另一個「平行時空」，有「民主派議員」成功就一地兩檢提出修訂，甚至通過將國際人權公約適用於高鐵西九龍站嘅內地口岸區——呢個「平行時空」，就係由一班學生組成嘅「模擬立法會」。

由香港青少年領袖發展協會舉辦嘅「模擬立法會」噚日舉行閉幕禮，立法會主席梁君彥無暇出席，但拍咗短片，呼籲參加者多啲關心社會議題、聆聽各方意見，及理性分析各個議題，仲希望有同學日後可以接棒，投身立法會。在場有大約10個學生舉手表態話有意從政。

「模擬立法會」由一班中學生組成，參加嘅學生會模擬立法會中不同嘅黨派，討論同制訂法案。有參與嘅學生模擬一地兩檢法案委員會，喺閉幕禮上分享獲通過嘅修訂內容，包括限制內地執法人員喺口岸區嘅武裝配備，以及將人權公約適用於高鐵站嘅內地口岸區。出席閉幕禮嘅立法會議員區諾軒笑言，同學通過人權公約適用於內地口岸區，係對中央「大不敬」，小心會被DQ(取消議員資格)呀。

更多港聞

工聯「三叔一花」齊睇《逆流大叔》

【明報專訊】電影《逆流大叔》講中唔少中佬心聲及面對嘅挑戰，劇情提及一班中佬組隊學扒龍舟，唔少觀眾讚《逆流》好睇又有港味；而繼泛民梁繼昌、邵家... 詳情

區諾軒1號波跑越野賽 緣慳野豬

【明報專訊】噚日全日掛起1號波，朝早橫風橫雨，立法會議員、南區區議員區諾軒就照樣走去參加越野賽，由香港仔郊野公園出發，跑去石排灣，全程大約8... 詳情