【明報專訊】每年暑假唔少大專生都會去立法會議員辦事處實習，了解議會運作情况之餘，滿足課程要求。做過青年新政游蕙禎議員助理嘅大專生李宗澤，近排去公民黨議員郭家麒辦事處做實習，但李宗澤喺facebook發文，話噚日喺立法會大樓議員辦做??陣，畀秘書處要求離開，原因係行管會前年11月起，以佢同另外12人曾衝擊會議室為由，禁止佢哋踏足大樓。李宗澤慨嘆現時「想讀個書做個普通人都要搞我」。郭醫生就話，會安排佢去地區辦工作。 李宗澤話，噚日朝早入去大樓大致順利，但秘書處下晝通知郭家麒，話李宗澤仍然喺黑名單，原本要求佢即時離開，最終畀佢留到放工。佢話諗唔到事件過咗一年半、「老細都坐埋監」，黑名單仍然存在，自己可以踏足唔同國家嘅議會，但香港嘅議會就入唔到，「都幾諷刺?」。 據了解，行管會日前已開會商討是否解除13人禁足令，但未有結論，最快下周會議有決定。郭家麒回覆Emily話，李宗澤會轉到地區辦事處工作，自己唔怪責秘書處，因為佢哋只係執行行管會命令，但會去信行管會要求撤銷，強調李宗澤當日無涉及暴力，而立法會係公眾地方，反問行管會「(李宗澤)係咪一世都唔入得？」
|
| |
| |
;){kind=small}
