中大文物館「戊戌說狗」賀新歲
[2018.02.03] 發表
【明報專訊】就快到農曆新年，香港中文大學文物館舉辦咗「戊戌說狗」展覽同大家迎狗年賀新歲。今次展覽展出一系列嘅狗類文物，包括戰國時期到現代嘅10幾件展品，等參觀者可以從多角度認識中國文化歷史中狗嘅痕迹。
其中精選展品有出自廣東佛山嘅素胎獅子狗，係20世紀早期嘅石灣窯陶工霍津所造，佢利用洋表秒針印壓技術，將獅子狗上毛髮逐條印壓出嚟，造工仔細令狗仔非常得意。
另一件焦點展品係晚清廣東畫家居廉嘅扇面畫，捕捉咗獵犬追逐野兔嘅情景。中大文物館嘅童宇博士話，獵犬係清代流行嘅品種，居廉用咗著名嘅「撞水」技法將獵犬極速奔跑嘅狀態呈現出嚟。提提大家，展覽由即日起到3月11日對外免費開放，如果想睇睇得意狗仔文物就預留時間喇。
更多港聞
相關新聞
