【明報專訊】以後又多一個地點欣賞維港三面海景喇！尖沙嘴海港城海運大廈擴建大樓新增頂層觀景台「海運觀點」已經開放，除咗可以免費270度觀看港九兩岸美景，大家仲可以玩「尋圖」遊戲，皆因法國街頭塗鴉藝術家Invader早前「突擊」海港城，留低咗18件作品喺商場內外。 天然草坪料月底開放 海港城海運大廈新增擴建大樓樓高5層、約10萬平方呎，大樓內主要為餐廳，大樓頂層有兩個近6500平方呎嘅活動空間，其中一個係天然草坪，但草坪上嘅草仍需時生長，暫料於月底開放。 另外大樓設有可供約200人使用嘅戶外梯級式看台，公眾可申請做表演場地。擴建大樓同舊大樓接通，郵輪碼頭嘅出入境位置亦由舊大樓遷至新大樓底層。 欣賞美景同時，市民可發掘Invader嘅馬賽克作品，事緣9月時Invader趁夜晚「侵略」海港城，後來被商場保安發現，海港城管理層見到大名鼎鼎嘅Invader到臨，就任佢搞，並同意保留其作品；Invader最終喺不同角落留低咗18幅作品，聽講海港城都要花一番工夫先搵齊。Emily噚日都同行家去尋寶，例如海運大廈停車場有巨型黃色船錨、擴建大樓平台就有手持區旗嘅食鬼！
|
| |
| |
;){kind=small}
;){kind=small}
