【明報專訊】當年政府規劃沙田至中環線(沙中線)時，最終放棄興建慈雲山站，被居民批評，而港鐵就提出興建扶手電梯、行人天橋同自動行人道等設施連接去鑽石山站。港鐵噚日話，經過多年工程，喺慈雲山區興建嘅行人設施已經全數竣工，當中最後一項行人設施，連接慈正邨至慈雲山中心、全長300米嘅行人天橋，亦都喺呢個月19號建成。

港鐵話，成個慈雲山區總共興建咗15組行人系統，涉及49項設施，包括10段有蓋行人通道、3條行人天橋、21部升降機、4條扶手電梯、7條樓梯同4段自動行人道，新設施2015年起陸續啟用，改善區內步行環境，亦令慈雲山區居民可以喺無障礙通道上行去鑽石山站。

港鐵總經理(沙中線及機電工程總管)李子文話，喺慈雲山起行人設施嘅工程難度，絕對唔會比起鐵路容易，因為慈雲山區人口密集，工地貼近民居，而且要喺又斜又窄嘅道路上展開工程，工人喺有限工地範圍內興建天橋，仲要吊運扶手電梯等機電設施，難度極高；加上為咗盡量減少對區內交通影響，工人要喺凌晨車流較少時分，分階段喺馬路展開大型吊運工作，所以都感謝各方合作完成工程各項挑戰。