領展加租保良局：想叫長者請願

【明報專訊】租金高企，唔少社福機構以至安老院舍都面對加租壓力，旗下有12間安老院舍嘅保良局都唔例外。保良局副主席林潞噚日同Emily傾開，原來保良局自己本身嘅物業好少，好多都要同房協、政府以至私人租，有啲同領展租就仲慘，試過要同領展講再加就經營唔到，講笑咁講話差啲要叫齊百幾個老人家去領展辦公室門口請願，鬧佢無良業主。

「上市公司都有社會責任」

林潞話明白領展係上市公司，但都要有啲社會責任，保良局嘅服務係做畀地區嘅老人家，無錢袋落自己袋，加租加到咁勁，保良局都要投降，但係要安排老人家搬去第二度好麻煩，好彩最後領展最後都肯加少啲，可以比市價低少少。不過，林潞就唔講涉及嘅安老院舍地點同租金加幅。

負責社會服務嘅林潞同Emily吐苦水，話安老院每10年就要重新投標，搞到佢想搵善長冠名贊助都好難，因為善長都好難接受𠵱家寫咗個名上去，10年後就要消失。佢話過去幾年發現要搵人捐錢畀教育或者兒童服務係易好多，但要搵人捐錢做老人服務就好難。佢透露月底約咗勞工及福利局長羅致光見面，希望政府可以幫下手。

更多港聞

林健鋒牛一 黨友送蛋糕

【明報專訊】身兼行會成員和立法會議員嘅經民聯林健鋒下周一（23日）65歲牛一，噚日成班黨友，包括立法會主席梁君彥、議員梁美芬、張華峰等同佢慶... 詳情

世界技能大賽 港隊奪8獎 美容護理攞銅牌

【明報專訊】喺阿聯酋阿布扎比舉行嘅第44屆「世界技能大賽」前晚圓滿結束，香港代表隊喺美容護理項目奪得銅牌，另外仲喺7個項目攞到優異獎章，包括... 詳情