【明報專訊】石永泰同梁家傑(傑哥)兩名大律師公會前主席，噚日喺香港電台《視點31》深入討論近日嘅覆核刑期案，兩人睇法雖然唔同，其間大家都平心靜氣君子交流。石永泰提到，佔中發起人之一戴耀廷將佔領運動處理得唔好，喺2014年後「講嘢都無人聽」，並笑住同傑哥講「其實你講嘢都無咩人聽」。傑哥無發火，反而苦笑話「啱呀」，之後仲自嘲，話「嗰陣後生仔話我老屎忽，話我廿幾年都做唔到嘢」。 以往石永泰就法律議題發聲，不時都有好多網民支持，不過節目噚日喺facebook直播，每當石永泰發言時就有唔少網民畀「嬲嬲」。石永泰話，自從接受有線電視嘅訪問出街後，好多朋友都向佢反映，話其實佢哋都有話想講，但擔心講咗出嚟政治不正確，所以唔出聲；佢承認當時嘅訪問內容，「深黃」(政治立場)朋友唔易接受。 石永泰同傑哥講，各人有各人嘅定位，大家都喺唔同崗位貢獻香港法治，傑哥做完大律師公會主席後從政，而自己無政無黨，亦唔會從政，「因為join咗之後反而一定要永遠講同一方向嘅嘢」。傑哥就回應話：「都唔係嘅。」
|
| |
| |
;){kind=small}
