【明報專訊】被囚近8年嘅諾貝爾和平獎得主劉曉波健康情况近期引起關注，教聯會會長黃均瑜噚日出席港台節目《城市論壇》，形容香港市民要求內地釋放劉曉波無問題，但要「易位思維」，話如果內地民眾要求釋放被判毆打示威者罪成嘅佔中七警，「大家又點睇呢？」 觀眾問「七警可攞和平獎？」 呢番說話引起爭議，台下即刻有觀眾要KO佢，話七警係犯法，但劉曉波係被政府以言入罪，反問﹕「唔通七警可以攞諾貝爾和平獎咩？」 城壇噚日討論國家主席習近平訪港同一國兩制實施，席間提到劉曉波。對於要求釋放劉曉波係咪挑戰習近平所講嘅國家安全「底線」，黃均瑜話，相信喺互相尊重各自司法制度同訴求嘅前提下，可以表達任何意見。佢之後回應時，講咗劉曉波同七警呢個比喻。 梁國雄轟比喻失倫 在場嘅社民連立法會議員梁國雄批評佢係「比喻失倫」、侮辱劉曉波。黃均瑜喺節目尾聲話，自己無意貶低「大家嘅偶像」，只係想講七警同劉曉波係兩宗唔同地方嘅判案，難以比較，如果覺得言論不當，「咁就各抒己見啦」。 公民黨黨魁楊岳橋其後喺facebook回應言論，話七警係犯咗刑事案，但劉曉波係被以言入罪，兩者完全唔能夠類比，而七警審訊係公開進行，但內地審劉曉波「又有無公開畀全國人民知道？」
|
| |
| |
;){kind=small}
