馮煒光將開公關公司寫專欄 「一定唔會利用梁振英」

馮煒光將開公關公司寫專欄「一定唔會利用梁振英」

[2017.06.28] 發表

【明報專訊】現屆政府仲有幾日先「落莊」，但部分班子成員已經做好「生涯規劃」，急不及待向政府申請離職後再就業。政府噚日公布，就食物及衛生局長高永文、副環境局長陸恭蕙及新聞統籌專員馮煒光(圖)離開政府後擬擔任工作所畀嘅意見。高永文離開政府後將擔任私人執業醫生；陸恭蕙將會到科技大學當兼任教授；馮煒光就會申請開設公關顧問公司，以及擔任報章專欄作家。

政府加條款禁披露機密

就高永文、陸恭蕙和馮煒光嘅申請，處理前任特首同政治委任官員離職後工作嘅諮詢委員會認為，高、陸兩人申請嘅工作唔會構成任何潛在利益衝突，亦唔預期有關工作會引起負面公眾反應或公眾觀感。委員會建議馮煒光從事有關工作時要遵守若干規限，政府接受意見，並就馮煒光嘅申請施加條款，包括唔可以披露政府機密等。

馮煒光同Emily講，將來嘅公關公司會專注處理財經同上市公司事宜，表明唔會做有關政治同公共事務嘅工作；而未來亦會喺一份報章撰寫網上專欄，計劃早期會先撰寫較輕鬆嘅話題，但會滲入政治角度，日後亦會評論時事。

對於早前有傳離開政府後亦會協助特首梁振英，馮煒光話若對方有需要，自己必定會幫手，「但暫時未睇到有需要」，自己未來工作上一定唔會利用梁振英，「費事提及前特首，嚇親啲客」。佢話已計劃離開政府後會去3個月旅行。

更多港聞