創科局fb斥Uber「知法犯法」 帖文半日吸3200嬲嬲

創科局fb斥Uber「知法犯法」帖文半日吸3200嬲嬲

[2017.06.10] 發表

【明報專訊】Uber嘅電召車服務畀警察大力打擊，Uber就大賣廣告同喺網上爭取市民支持；政府都不甘示弱，以推動創新為己任嘅創新及科技局噚日下晝喺facebook貼文發炮，批評Uber「知法犯法」、「沒有自我檢討」，令電召司機繼續因違法取酬載客被捕，「以創新共享經濟為藉口，為自身商業利益而不負責任的做法」。帖文引嚟唔少網民反彈，截至今日凌晨1點，已經有3200個「嬲嬲」，只得不足50個讚好。

創科局嘅帖文形容，Uber提供電召車同UberEATS(餐飲外送)兩項「所謂創新共享經濟服務」，分別在於電召車被裁定違法，但UberEATS就合法，「可見Uber是完全有選擇採取合法或違法方式推動共享經濟」。帖文又批評，Uber成日話好多地方都容許經營，但質疑Uber點解唔提一下有國家已經裁定Uber違法。

有網民反駁，問題根源係現行法例過時，認為政府只講Uber犯法，但唔講好多國家其實已經修改法例，畀電召車軟件合法經營，同時接受規管。

Uber回覆Emily時話，包括中國同澳洲等超過100個政府，已經就汽車共乘立法，Uber相信有可行法律框架令服務喺香港可以納入規管，Uber強調會研究唔同方案，期望同相關部門商討，點樣以安全同可靠服務回應市民需求。