區會外訪 泛民質疑撞正六四 譚凱邦﹕珠海與區會有啥關係？

區會外訪泛民質疑撞正六四譚凱邦﹕珠海與區會有啥關係？

[2017.05.31] 發表

【明報專訊】政府由今屆區議會開始，為每名區議員4年任期提供1萬元撥款，用作海外職務訪問。荃灣區議會下月初為區議員舉辦珠海外訪團，日期橫跨「六四」，行程包括參觀港珠澳大橋、交通、街道同沿海設施，但有民主派區議員質疑，區議會工作同珠海有咩關係，又質疑由建制派主導嘅區議會，點解揀喺六四期間搞團。

稱回鄉證已剪缺席因免影響他人

新民主同盟譚凱邦話，自己喺佔領運動時已經「剪咗」回鄉證，為免影響他人，所以缺席外訪團，至於其餘3名民主派荃灣區議員，亦唔會參加今次外訪。譚凱邦質疑外訪珠海同區議會工作有咩關係，而外訪團喺6月3日至5日舉行，「橫跨六四點去？」

建制派：可借鑑珠海經驗

珠海團由荃灣區議會轄下嘅外訪工作小組安排，每人收費2038元。Emily噚日聯絡身兼小組成員嘅民建聯區議員林琳，佢話自己無出席早前決定外訪目的地同日子嘅小組會議，但認為譚凱邦「諗多咗」，因為香港回歸20周年在即，區議員喺6月中至8月都會參與多項回歸活動，所以6月初相對鬆動，而外訪團亦要視乎接待單位安唔安排到時間。

林琳話，今次外訪團應該有10多個區議員參加，但佢因事將會缺席。佢強調，港珠澳大橋對成個新界西嘅交通同基建都有影響，所以有需要考察，而珠海沿海設施同交通議題，亦可以畀區議員借鑑，處理荃灣地區議題。

更多港聞