八達通資助搭復康車 輪椅者受惠

八達通資助搭復康車輪椅者受惠

[2017.05.12] 發表

【明報專訊】香港交通發達，但唔少輪椅人士礙於出行困難，寧願唔出街留喺屋企。八達通卡有限公司(八達通)噚日宣布繼續同香港復康會合作，資助合資格領取綜援嘅輪椅人士，透過復康會嘅轎車提供「點到點」無障礙交通服務，推行期由今年4月1號至出年12月31號。

八達通行政總裁張耀堂話，希望透過計劃幫助到輪椅人士走入社區。根據八達通網頁，繁忙時間使用轎車服務嘅輪椅人士，八達通每程最多資助195元車費，非繁忙時間最多資助160元。

八達通最先喺2014年4月同復康會推出計劃，過去3年資助咗2.26萬程「點到點」無障礙車程畀輪椅人士使用。其中一名使用者許先生話，當年因為交通意外導致行動不便，但自從使用八達通有關服務後，佢可以多啲同朋友聚會，得閒仲可以參與戲劇同廣播劇演出，亦可因此照顧近月因病住院嘅父母，令佢覺得自己由「被照顧者」變成「照顧者」，感到非常欣慰。