【明報專訊】3個特首候選人噚日首次同場較勁，出席教協舉辦嘅選舉論壇。嚟緊亦都有兩場論壇畀3人繼續較量，包括聽日由七大電子傳媒舉辦嘅選舉論壇，同埋禮拜日(3月19日)由選委舉辦嘅論壇。當中後者，行政長官選舉論壇籌備委員會成員、資訊科技界立法會議員莫乃光(Charles)話3人都已答應出席，本周初亦會向全部選委發邀請函。論壇禮拜日晚上7點喺亞博館舉行，歷時兩個鐘。 屆時候選人將向選委闡述管治理念同政綱，亦需要回答選委同公眾嘅提問。公眾可透過電郵至2017ceforum@gmail.com，向籌委會提交問題，論壇上會以抽籤形式揀出問題，並交由主持人向候選人提問。至於論壇有無候選人互相問答環節，Charles就話流程需要再商討，日內會落實。
|
| |
| |
