生態調查員 攀山涉水唔怕髒

生態調查員攀山涉水唔怕髒

[2017.02.20] 發表

【明報專訊】為咗研究本港野生動植物，漁護署原來設有生態調查員職位，工作係行遍全港蒐集生態資料，建立自然知識寶庫。漁護署二級農林督察黃光智做咗3年幾生態調查員，主要研究蛇、蛙、龜、蜥蜴等兩棲爬行類動物。

每周巡查兩三次

呢份工唔易做，因為兩棲爬行類行蹤隱秘，好多時有保護色，調查員就要翻石頭、用燈照，鬥智鬥力先會有發現。佢哋要記錄動物品種、性別、數量、日期、時間、天氣等資料，並利用全球定位系統記低動物出沒位置，影相存檔。

調查員每星期巡查兩至三次，走訪全港樹林、溪澗、淡水濕地、沼澤等，黃光智覺得工作極具挑戰性，仲親眼見過越南烙鐵頭、鈍尾兩頭蛇、香港雙足蜥等罕見物種。

至於點樣先可以做到生態調查員，2014年底成為生態調查員嘅二級農林督察唐志斌話，除咗要修讀過生物學、生態學、環境科技等相關學科，仲要符合體能要求，因為不時要去戶外工作，日曬雨淋出入山澗，但「最重要是愛自然、愛動物，不怕苦、不怕髒」。2002年起，漁護署喺全港展開生態調查，生態調查員分別負責哺乳類、淡水魚、蝴蝶、蜻蜓、鳥類、植物等9個小組嘅調查工作。