經民聯雞年賣鴨 主題一定Duck 田北辰雞蛋論特首﹕唔好放晒一個籃

經民聯雞年賣鴨主題一定Duck 田北辰雞蛋論特首﹕唔好放晒一個籃

[2017.01.23] 發表

【明報專訊】維園年宵噚日開鑼，唔少政黨一如以往擺檔「吸水」，迎接雞年。經民聯就有啲估佢唔到——喺雞年賣鴨，經民聯就話，今年花市主題係「香港一定Duck」，都係玩食字啦。

新民黨就主打雞形毛公仔，黨主席葉劉淑儀今年參選特首，但勢頭暫似乎唔及兩名前司長，副主席田北辰噚日為攤位致辭時形容雞嘅求生意志好強，要阻止雞向前進唔容易，又話細細個已經知道，唔好將所有雞蛋放落同一個籃，因為即使大家以為個籃無堅不摧，但世事難料，例如「梁特首決定唔參選」。唔通比喻緊葉太選情？田二少就話不能言明。葉太致辭時大玩普通話食字，話「雞」年亦係「機」遇同生「機」之年，相信雞年處處有機遇，並手持「促進和諧」同「心想事成」揮春畀傳媒影相。

經民聯攤位邀得食衛局長高永文捧場，立法會主席梁君彥、黨主席盧偉國同副主席梁美芬都有出席，攤位主打小黃鴨精品，小黃鴨就係副主席林健鋒爸爸林亮當年製造嘅經典塑膠玩具，黃鴨可愛，但雞年賣鴨都幾搞笑。

社民連賣長毛牌餐肉咕𠱸

特首參選「紅綠燈」之說不絕於耳，公民黨今年賣「神奇出閘紅綠燈」，仲擺咗一個印有幾個特首人選頭像嘅轉盤，畀市民轉出「下屆特首」。黨主席梁家傑試吓運氣，點知轉中葉太，只差一格先轉到「我要有權選特首」。傑哥笑言市民其實都無得揀特首，葉太亦未必夠票入閘咁話。其他政黨方面，社民連今年賣長毛牌午餐肉罐外形咕𠱸，反諷拉布批評同互擲午餐肉事件；民主黨就賣「勁共」飛行棋，諷刺特首選舉。