【明報專訊】港鐵噚日喺海洋公園站舉行南港島線啟用慶祝典禮，擔任主禮嘉賓嘅特首梁振英(CY)致辭時話自己係「當之無愧嘅鐵路服務fans(支持者)」，今次亦係自己3個月內第三次獲安排出席港鐵活動。 賀南港島線啟用 CY話南港島線東段通車，係南區居民期待已久嘅喜事，因為以往居民只能依賴路面交通，出入都受香港仔隧道擠塞影響。南港島線東段通車後，由海怡半島去金鐘只需11分鐘，比現時繁忙時段需要15至45分鐘大為縮短。 港鐵主席馬時亨致辭時就大讚CY對鐵路發展有貢獻，包括喺施政報告中提出成立港鐵學院等。馬時亨話，雖然CY出年7月唔再係特首，「但我可以話畀大家聽，你對港鐵嘅貢獻，我哋每一個員工都會記住」。 慶祝典禮亦邀請咗南區區議員同立法會議員到場，立法會鐵路事宜小組主席田北辰仲喺海洋公園站嘅天橋度做facebook live，話自己1990年代搬入南區，每次返立法會都要經歷塞車之苦，但南港島線通車後就可以瞓晏啲、健康啲。 而民主黨4名南區區議員包括羅健熙同柴文瀚等，之前整咗條片講吓成功爭取，話回顧民主黨自1990年代起爭取起南港島線，一代又一代爭取，又話工聯會同自由黨曾經聯手反對，去到2007年時任特首曾蔭權先至落實興建東段，令南區居民好似片中所講「等一條鐵廿年」。
|
| |
| |
;){kind=small}
