【明報專訊】今屆政府任期只剩幾個月，噚日立法會上，教育界議員葉建源動議「下屆教育局局長須具備的條件」議案，話下屆教育局長要有洞察力、領導力同識群策群力，咪再揀個「唔得掂」。 葉建源批評現任教育局長吳克儉係「一枝獨秀地乏善可陳」，任期內只係識外遊，對教育事務無承擔，令香港教育停滯不前。佢仲話下屆特首要引吳克儉嘅人辦為戒，謹慎揀個好局長，否則香港教育未開始已經跛腳。 但民建聯張國鈞認為唔少教育問題已經被政治化，部分議員對吳局長嘅批評唔係有助處理教育事務，只係令「當官者無好下場」，佢提出修訂議案，將葉建源批評吳嘅用字刪除。最終由葉建源動議、經張國鈞修正嘅議案，喺地方直選同功能組別兩組點票都獲通過。 吳克儉喺總結時就話，佢無逃避教育嘅問題，只係努力要五年十載先見效。佢仲話，要有好嘅教育政策唔可以係一個人嘅事，要由團隊、家長、學生同社會共同配合先成事。
|
| |
| |
