民主動力：泛民聖誕前傾立會補選初選
[2016.12.10] 發表
【明報專訊】青年新政梁頌恆同游蕙禎議員資格覆核案上訴被駁回，立法會刊憲公布兩人議席出缺，意味將會補選。泛民唔少政黨對補選蠢蠢欲動，不時為泛民協調嘅民主動力，召集人趙家賢噚日喺傳媒茶敍提到，泛民會喺聖誕節之前坐低，傾吓會唔會為補選搞初選，睇吓有無共識。
初選一般有利大黨，9月立法會選舉亦曾經因為大黨同細黨傾唔埋，協調唔到超區名單。對於點樣拉近大、細黨分歧，身兼民主黨區議員嘅趙家賢話，暫時未有具體方向，但會有平台畀各黨表達想法，即使搞初選，形式亦唔會同以前一模一樣。佢都承認，搞初選有好多變數。
新民主同盟范國威(Gary)早前落選立會，Gary黨友、民主動力副召集人鍾錦麟，噚日對Gary會唔會出戰補選不置可否，話Gary會先做好地區工作，同檢討「務實本土」嘅論述。
對於新同盟會唔會參加初選，鍾錦麟話有好多因素要考慮，包括點樣分擔初選開支，而落敗者又使唔使為贏出初選嘅人背書。佢補充，新同盟暫無計劃招兵買馬，又笑住話「患難先見真情」。
更多港聞
相關新聞
