【明報專訊】9月立法會選舉結果本已塵埃落定，最近就因青政兩人被判喪失議員資格又惹來補選爭議。喺新界東落敗嘅立法會前議員鄭家富噚日開記招，倡議泛民搞初選定出補選人選。 鄭家富9月參選立法會後，一直被人指摘「𠝹走」新同盟范國威嘅選票，被質疑係「鬼」。佢噚日喺記者會上對呢啲指控耿耿於懷，多次趁機為自己平反。佢話，「你可以話我太有自信心，唔理其他泛民，但唔可以無中生有，話我係鬼、我收錢」，又話指控者要拎出證據，除非自己選後做到政協人代，或者喺內地開律師行，否則點會為利益去𠝹票。立法會選舉前，新同盟區議員臨陣過檔支持阿富，搞到雙方互相指摘，阿富噚日就話，自己同范國威無私怨，只係對方唔信任自己，視自己所有政治動作都有陰謀喎。 佢話自己今次提出為補選搞初選，網上已即刻有人抹黑話係𠝹票。佢就反問，如果自己係鬼，「使咩提初選？」
|
| |
| |
;){kind=small}
