【明報專訊】新一屆立法會會期即將展開，候任醫學界議員陳沛然(圖)近日「左右逢源」，先獲建制派邀請加入手機通訊群組，噚日就出席新一屆非建制候任議員首次閉門會面，不過佢噚日就強調，唔會透露一邊嘅資料畀另一邊。既然兩個陣營都咁歡迎佢，而佢兩邊都吃得開，唔知陳醫生有無興趣選立法會主席呢？ 陳沛然近日接受傳媒訪問時，形容建制派嘅通訊群組暫時無特別嘢睇，相信群組屬於「核心外圍」，無秘密講。佢噚日喺非建制會面後同Emily講，話對繼續出席非建制會面持開放態度，因為相關會面唔係泛民「飯盒會」形式；至於會唔會同建制派坐低傾吓合作，佢話要視乎情况，但舉例話喺重推骨灰龕條例佢可以幫吓手。 由6個非建制功能組別議員組成嘅「專業議政」，近日邀請陳沛然加入。陳沛然噚日無正面回應會唔會加入，話雙方未坐低傾，自己對係咪參與持開放態度，但同時話自己唔鍾意被綑綁，呢個答案就令Emily腦海留下一大個問號。
|
| |
| |
;){kind=small}
