香香好肉緊﹕想咬嘉欣B女腳仔

[2016.08.28] 發表

【明報專訊】馬國明、岑麗香、黃翠如、黃心穎等昨日出席無綫新劇《為食神探》宣傳活動。香香、翠如、心穎及楊秀惠4個「宅男女神」咬住「奶嘴糖」玩遊戲，冧死現場觀眾，又落台與粉絲近距離接觸。

對於好姊妹鍾嘉欣公開B女Kelly照片，香香說﹕「其實我不清楚BB何時出世，都是早大家幾分鐘見到張相，要恭喜嘉欣BB及B女，祝她身體健康，BB肥肥白白是個小天使，希望大家畀她多些私人空間去調理身體。(已在群組恭喜嘉欣？)係，一班姊妹也十分期待見B女的一刻，有人話想咬她隻腳仔，我都想咬。(嘉欣會擺百日宴或滿月酒？)未知。大家都好興奮，講緊BB有幾得意、幾多頭髮，肥肥白白好可愛，跟爸媽都似，希望長大後似嘉欣。(何時到自己做媽咪？)暫時不會，自己好樂意做保母，跟朋友BB玩。」香香又笑言B女的契媽應該不是自己，等B女自己揀。

馬國明準備禮券做禮物

馬國明好戥鍾嘉欣開心，期待回來時有機會合作。自己會送禮券，讓嘉欣自行選購合心水的BB用品。至於何時到他做爸爸？馬國明笑說﹕「無咁快，就算現在有樓有事業亦未必一定要結婚，要看何時撞到對的人。」新劇緊接《城寨英雄》推出，馬國明希望自己與阮兆祥的火花能吸引到觀眾。

黃翠如蕭正楠各有各瞓

黃翠如日前與男友蕭正楠到北京宣傳，返港時撞正航班延誤近5小時，兩人貪睡而放棄溫馨時刻。翠如說﹕「在飛機上我瞓了，等候時間就輪到他瞓，大家都太攰，全程幾乎無傾偈，我哋同樣開戲加宣傳，所以當北京此程是『瞓覺程』，就連食飯都是在機場。其實今次幾得意，未試過即日來回北京。」提到有份拍攝《使徒行者2》？翠如只知與袁偉豪及周柏豪有感情線，很期待與宣萱合作，皆因一直很喜歡宣萱演戲。

記者﹕梁榮達