【明報專訊】風靡全港嘅Pokémon Go熱潮仲未減退，唔少人一得閒就繼續做訓練員，而速度比較慢嘅電車就成為最好選擇，皆因唔使喺街日曬雨淋都可以捉到唔少精靈。電車公司營運經理李明耀(Benjamin)噚日話，Pokémon Go令以往電車比較少人嘅晚上時段多咗客，佢個人估計呢啲時段嘅客量增加10%，但整體客量增加幾多，佢就話公司未有特別分拆嚟睇。電車公司就話，的確未特別統計呢方面多咗幾多客。

中途上車乘客可能無位坐

Benjamin話，根據站長觀察所得，近日多咗青年聯群結隊喺電車總站排隊，特別喺周末或平日晚上8至12點，好多時啲青年先喺總站附近捉一陣精靈，再集體排隊等車，而且無位就唔上車，寧願等下一架電車。佢話，訓練員上車之後，通常都係總站搭到總站，沿途全力捉精靈，令電車長途客近期有增長，但中途上車嘅乘客就可能會無位坐。

之前有巴士車長玩捉精靈畀市民發現，Benjamin話，電車公司已經發出指引，禁止車長開工捉精靈，暫未發現有人違規。電車公司董事總經理魏文(Emmanuel Vivant)就話，自己都做過訓練員3日，了解一下潮流，但之後就無玩到，所以佢講笑話自己Level好低。