書展分享會 回憶英文教師似長毛 參選特首？ 曾鈺成：我會run away

書展分享會回憶英文教師似長毛參選特首？曾鈺成：我會run away

[2016.07.22] 發表

【明報專訊】立法會主席曾鈺成近期回應參唔參選特首嘅問題，都係答「拭目以待」，自然引嚟臆測，曾主席噚日喺書展出席自己新作《英語人生曾鈺成》嘅分享會時，席上英文專家詹德隆提到參選嘅美式英文係「run for election」，問主席會唔會run吓，曾主席聞言輕輕一笑，話自己會「run away」(走開)。唔知主席咁講，係表示走開唔玩，定係走開唔答呢？

發表新作講學英文心得

曾鈺成分享英文心得之餘，不忘評論政事，話一國兩制如果要成功，唔係要一個陣營消滅另一個陣營，亦唔係要打到對方片甲不留，咁香港先會有「大和解」。

梁振英當年勝選特首之後，曾經形容香港無梁營、唐營同何營之分，只有一個香港營，但近年唔少意見認為社會步向撕裂。

曾鈺成噚日亦回憶中學時期學英文，話有個教佢英文嘅外籍老師，其實好似社民連梁國雄，經常突破規矩，令其他同事皺眉，例如會用布帶勒住西褲褲頭當皮帶，又曾經喺一份滿分20分嘅作文，畀曾鈺成47分。不過，曾鈺成就話好欣賞呢位老師，因為佢識得引起學生興趣，上堂講嘢亦「有料」，所以直至對方過身前，都一直有探望佢。

曾主席噚日又話，如果母語為廣州話，最有效嘅學習語言一定係廣州話，如以普通話去學中文，學生唔使將口語翻譯為書面語，但同時對其理解與分析能力亦一定會有影響，所以要小心衡量益處同壞處。

更多港聞