被問兩司長適唔適合做特首 CY﹕林鄭財爺係「得力助手」

[2016.05.31] 發表

【明報專訊】距離下屆特首選舉仲有唔夠一年時間，近日關於特首跑馬仔嘅新聞亦愈吹愈熱，政務司長林鄭月娥或財政司長曾俊華不時都榜上有名，被形容為「蠢蠢欲動」。特首梁振英(CY)接受無綫電視專訪時，被問到林鄭同財爺係咪適合做特首，CY話大家從來無討論過呢個問題，仲強調佢哋係佢嘅「得力的助手」，強調今屆政府團隊好齊心。

宴請全體議員 20多建制出席

CY喺專訪中亦被問到，林太有咩優點係佢無嘅，CY話林太好熟悉政府運作，曾任職社會福利署，「佢(林太)個心完全同我一樣，做呢啲工作，佢對政府運作當然比較熟悉，所以係非常非常得力嘅一位司長」。CY話，希望下屆政府可以延續佢嘅政策方向，包括處理強積金對冲、退休保障制度等問題。

另外，CY噚晚聯同「得力助手」同其他司局長，宴請全體立法會議員，但民主派早前已表明唔會出席，加上有建制派議員有其他活動，所以噚晚只見20多名建制派議員。

CY林鄭將離港財爺署任特首

CY喺facebook貼大合照，話席間議員提出保障就業、退休保障、對冲，以至泛民回鄉證等問題，CY表明會盡力盡早解決。

此外，CY下星期二(6月7日)會帶同19名大專院校工程相關學系學生一齊出訪法國，參觀當地嘅航空科技、科研同創新科技機構，喺10日返港。而林鄭今個星期四(2日)會出訪美國，同當地官員見面、出席商務午宴，以及參觀博物館等，11日返港。換言之，政府兩名最高級官員都會同期離港，所以喺CY離港期間，財爺將署理特首職務。