【明報專訊】政界早前傳出，經民聯梁君彥(Andrew)將接棒曾鈺成做下屆立法會主席，不過佢做內會主席嘅處事手法，就一直畀泛民質疑偏頗。噚日喺立法會內會，梁君彥再次差啲同人民力量陳偉業開火，仲搞到泛民集體離場表達不滿。 擔心會期不足討論扶貧泛民捱批 事關噚日討論到係咪要優先編配扶貧小組委員會報告辯論，有泛民關注剩低會期唔多，擔心無足夠時間。Andrew就多口反駁，「機會喺議員手度」，怪責有人「拉布」。呢句話隨即激起大舊不滿，佢拍枱大罵「白癡、噏得就噏」，不過Andrew亦唔示弱，將對方趕離場。多個泛民議員就一齊離場抗議。 泛民會議召集人何秀蘭會後批評，梁君彥嘅講法「小學雞，撩交嗌」。大舊亦強調人力無否認過去拉布，但早前已停止拉布行動，話梁君彥扭曲事實，不負責任。不過Andrew就否認呢句話係挑釁，而係有議員「對號入座」。佢又話，議員有無拉布，公眾有目共睹，自有判斷。
|
| |
| |
