保留民主黨總幹事職 林卓廷戰立選唔辭職惹爭議

保留民主黨總幹事職林卓廷戰立選唔辭職惹爭議

[2016.05.02] 發表

【明報專訊】民主黨總幹事林卓廷自1月起停薪留職，目前專注地區工作，好大機會為黨披甲循新界東參選9月立法會。雖然早前會員大會通過有關決定，但黨內就有人對阿廷保留總幹事職位不滿，其中東區區議員趙家賢透露，有黨友不滿阿廷繼續「掛名」，得到更多傳媒訪問機會，或會對其他民主黨候選人唔公平；據聞有人更加覺得阿廷有利益衝突，要求佢辭去總幹事一職。

阿廷：係中委會決定

阿廷同Emily講，做訪問嘅題目通常同貪污如圍標等事件有關，強調並無講黨務，而佢停薪留職總幹事係中委會決定，佢自己亦喺會員大會公開承諾，如果9月當選立法會議員，佢就會辭去總幹事一職；如果唔出選或者選唔到，佢嘅去向就由中委會再定奪。

民主黨副主席羅健熙亦喺facebook撐黨友，話理解黨友憂慮阿廷專注參選可能會影響總幹事職務，甚至可能出現利益衝突，所以1月起停薪留職，佢話中委會曾為呢件事成立由秘書長領導嘅工作組探討相關安排，中委會亦多次討論。考慮到總幹事職務敏感，既要熟悉民主黨運作，又要得到中委會完全信任，仲要有能力統籌選舉，短期內好難搵適當人選，所以決定暫時由佢以及中常委黎敬瑋，共同兼任跟立法會選舉相關嘅實務統籌工作。

更多港聞