搶包山9男3女入決賽
[2016.05.02] 發表
【明報專訊】今年長洲太平清醮將於5月14日(周六)舉行，噚日舉行咗重頭戲搶包山嘅選拔賽，65名選手鬥快爬上約14米高嘅包山，經過一番「龍爭鳳鬥」，共有9男3女進入決賽，男子組又係由6年霸、任職消防員嘅郭嘉明最快攻頂；女子組就係3屆包后黃嘉欣，各位健兒good luck呀！
自2005年復辦嘅搶包山，上年因為雷暴警告而取消，康文署今年新增章程，如果比賽當日賽事取消，大會將以選拔賽成績決定名次並即時頒獎，令選拔賽更顯重要。狀態大勇嘅郭嘉明以8秒86攻頂，溫尚融緊隨其後9秒完成；黃嘉欣就用咗12秒49。圖為12名健兒合照。
(政府新聞處)
更多港聞
相關新聞
