鄉事組黨出師不利 侯志強：聽唔到有咩打壓

鄉事組黨出師不利侯志強：聽唔到有咩打壓

[2016.04.25] 發表

【明報專訊】由多個鄉事派成員組織嘅政黨「新進步聯盟(新進聯)」原定今日舉行「成立典禮」，不過早前籌委會指未正式取得公司註冊處文件，所以要取消典禮。有份組織新進聯嘅上水鄉事委員會主席侯志強話「聽唔到有咩打壓」，強調香港有結社組黨自由。至於可唔可以趕得切喺9月立法會選舉前成功組黨，侯志強就叫大家問政府，幾時會批公司註冊牌照畀佢哋。但佢強調參選同組黨係兩回事，「好多都係獨立人士參選啦」。

有無面子「市民自有分曉」

港台《城市論壇》噚日大談鄉事組黨問題，對於有人質疑自行組黨係搞個人主義，侯志強強調「絕對唔係為自己打拼」，係為咗原居民同香港市民。侯志強又話，有啲人為咗某種原因唔支持組黨，「啱我哋理念，我哋走埋一齊囉，佢有其他理念，佢咪飛黃騰達囉，無問題㗎」。被問到未取得公司註冊而要取消成立典禮會唔會「好無面」，侯話「面係人畀，架就自己丟」，但有無面子「觀眾、市民、村民自有分曉」。侯志強重申，若公司註冊獲批，會開執委會及諮詢各條村各市民意見，再擇「良辰吉日」定奪。

至於組黨煞停係咪被中聯辦打壓？侯志強好玄咁話「世界嘅壓力無處不在」，連呼吸一口氣都會造成壓力，但佢強調「聽唔到有咩打壓」。

更多港聞