【明報專訊】大熊貓盈盈樂樂進入一年一度嘅繁殖季節，海洋公園噚日起暫時關閉「大熊貓之旅」展館，以減少遊人對大熊貓交配嘅影響。盈盈和樂樂同為10歲，今年進入第六個繁殖季節，海洋公園動物及教育部執行總監蔣素珊話，盈盈過去數星期出現玩水、發出「咩」叫聲及躁動等發情期行為，佢身體狀况同荷爾蒙水平亦出現變化，而由於大熊貓主要以氣味溝通，故園方安排咗盈盈同樂樂交換居所，畀佢哋喺發情高峰期共處時已熟悉大家氣味，盼令自然交配更順暢。

蔣素珊話，觀察到樂樂尋找盈盈氣味標記嘅頻率愈來愈高，證明佢哋已非常接近發情高峰期。佢話，為提高盈盈同樂樂成功交配機會，園方平日為樂樂安排強化後肢肌肉訓練，同時希望盈盈於上一個繁殖季節嘅成功交配經驗，有助帶領樂樂自然交配；又話會為盈盈人工授精，以增加受孕機會。

海洋公園話，大熊貓懷孕過程充滿變數，受精卵子進入子宮時間常常延遲，懷孕期長達70至324天，但即使盈盈身體同荷爾蒙水平呈現懷孕迹象，亦未能確定懷孕，而「假懷孕」情况時有發生。盈盈去年底曾成功懷孕，但最終「胎死腹中」，胎兒被母體子宮吸收。