青年民建聯主席話《十年》年度最佳

[2016.04.05] 發表

【明報專訊】電影《十年》奪得金像獎最佳電影成為網上熱話，有影圈中人仲話係不幸。但其實呢件事又唔使黑與白分得咁清楚，好似青年民建聯主席顏汶羽(圖)噚日就喺facebook評論事件，話呢部電影嘅人，「敢於說出自己的想法，便已是最佳了」。不過，汶羽同Emily講，其實無論泛民或建制，無人會想見到劇情變真，話「《十年》由上年開始已打響了警號，提醒我們要合力阻止電影中的一幕幕變成真實。十年後回首，希望這一切都仍然只是電影的情節」。

fb話「每個港人心中最佳」被批

汶羽話去年12月有購票入場，佢喺fb留言就話，「在我看來，她不是專業上的最佳，但她能穿梭每一個社區，每一個港人心中，是今年度的最佳」。不過，作為建制派一員嘅汶羽，呢次留言就畀fb朋友批評，指汶羽憑乜嘢講「每一個社區」、「每一個港人心中」？汶羽其後就客氣回覆，「我沒有說此電影代表每一個人，也沒有說我代表每一個人。我是說此電影引起社會上極多人討論，不論是讚賞或批評而已」。

前晚嘅頒獎禮公布最佳電影時，會計界立法會議員梁繼昌喺觀眾席彈起拍掌。佢話幾齣入圍最佳電影嘅作品，以《踏血尋梅》及《十年》最有特色及話題，前者已奪得多獎，《十年》奪最佳電影亦合理。佢又話今次頒獎禮其實都有足夠平衡，好似《智取威虎山》都攞咗最佳導演等獎，都可以話政治正確。梁繼昌話《十年》技巧較幼嫰，但一批新晉導演以幾十萬元，能講到5個唔同嘅短篇故事，有實驗性質又有煽情味重嘅故事，撇開政治立場，今次佢哋獲獎，對鼓勵本地電影創作有正面成用。