【明報專訊】立法會9月改選，廠商會有邊個出嚟爭工業界(二)議席仍然係一個問號，商會內部盛傳廠商會會長李秀恒同副會長吳永嘉係出選大熱。廠商會噚日搞傳媒午宴，李秀恒對於選唔選照例不置可否，但就將事件扯到黃之鋒身上，話如果商會無人有興趣，而黃之鋒走出嚟選工業界，到時佢梗係反對，咁就要考慮去選喇。不過，李秀恒又唔使擔心，因為黃之鋒未夠21歲，不符參選資格。

澳門搞工展會反應佳

對於會唔會選，李秀恒話廠商會除咗佢，其餘9個副會長級人士都有足夠資歷參選，又話自己好忙，雖然有人叫佢選，「但最好唔好搵我啦」，如無合適人選，佢先會考慮。

講番廠商會工作，副會長戴澤良話本月啱啱完成首次舉辦嘅澳門工展會，話反應遠比預期好，除咗澳門居民，仲有唔少內地旅客幫襯，所以佢哋立刻決定明年再辦，連展場都即刻訂埋，希望明年展期由今年嘅3日延長至7日，仲希望年年都搞。

廠商會4月底會率團去中亞三國考察一帶一路商機，酷愛攝影嘅李秀恒就話，到時佢除咗帶團，仲會做埋隨團攝影師幫大家影相。